Yoggo in de Germania. Fern Virchow.
Kanister: Hebbert, guck doch! Da hinne! Die do hockt... Is des net die... Des is doch die...
Herbert: Die da hinne? Die mit de Sonnebrill? Warum hatt die e Brill uff? Is doch gar net dunkel hier. Dass die e Sonnebrill...
Kanister: Hör doch uff mit dere Sonnebrill. Des is doch die wo mit dem Lennen zusamme war.
Herbert: Die Ono? Die Yoggo Ono?
Kanister: Genau, die Yoggo. Meine Fresse, is die alt geworrn.
Herbert: Mir werrn all net jünger, hehe. Was machtn die Yoggo hier in de Germania?
Kanister: Woher soll isch des wisse. Geh hin fraach se... Gell, des isse doch?
Herbert. Vielleischt isses. Wart, ich fraach. (Steht auf.)
(Herbert setzt sich.)
Kanister: Un? Isses?
Herbert: Se saacht, se weiß es net. Zumindest wär se sisch net sischer.
Kanister: Was? Die muss doch wisse, ob ses is.
Herbert: Naja. Des versteh isch schon. Guck doch, was die alles hinner sisch hat: De Lennen und die Pilzköpp, de ganze Tratsch um des End von dere Grupp, dann die Plasticonobänd, davor als middem Käitsch unnem Tjudor rumgegammelt, de ganze Kram von de zweite Wiener Schul im Kopp, die Häppenings und Pörformänzes, de Dada und de Fluxus. Hör uff, de werste doch bleed im Hern.
Kanister: Eijo, wann mers so betracht. Un versucht die als noch die Popmusik mit ihrm schräge Avontgardkram zu verännern?
Herbert: Isch glaab schon. Klappt abber net. Abber was se mit dem Lennon zusamme veranstaltet hat, des war schon net schlecht. Des mit de ganze Bettaktione und dem Loch, wo mer durschgugge konnt...
Kanister: Net schlecht, echt net schlecht. Un heut... Hoggt se rum in de Germania.
Herbert: Eijo, lass se doch. Komm, mer trinke noch aaner.
Kanister: Guud Idee... Hebbert, jetz guck emol, do hinne. Der middem Halstuch. Des is doch de... Na, wie haaßt er dann... Gleisch komm isch druff...
Herbert: Wieso hatten der des Tuch um? Is doch gar net zugisch hier...